மத்தி மீன் குழம்பில் எண்ணெய் சேர்க்கலாமா?

மத்தி மீன் அல்லது சாளை மீன் என அழைக்கப்படும் மீனானது மீன் எண்ணெய் எடுக்கப் பயன்படும் மீனாகும். இந்த மீன் அதிக அளவில் கடற்பாசிகளை உணவாக உண்டு வாழும் என்பதனால் இதன் உடலில் இயற்கையாகவே மனிதர்களின் உடல் நலனிற்கு தேவையான எண்ணெய் தன்மை இருக்கும். 

மத்தி மீன் குழம்பில் வேறு தாவர எண்ணெய்யை கலந்துவிட்டால் மீன் எண்ணெய்யின் தன்மை மாறிவிடும் என்பதனால் எண்ணெய் சேர்க்காமல் சமைப்பதே உடல் நலனிற்கு நல்லது. வாங்க எண்ணெய் சேர்க்காமல் மீன் குழம்பு செய்வது எப்படியென பார்க்கலாம்.

எளிமையான மீன் குழம்பிற்கு தேவையான பொருட்கள்

மத்தி மீன் (சாளை மீன்) – 1/2 கிலோ
புளி – ஒரு எலுமிச்சை உருண்டை அளவில்
சின்னவெங்காயம் – 10
தேங்காய் – 1/2 மூடி
சின்னசீரகம் – தேவைக்கேற்ப
மிளகாய்த்தூள் – 2 தேக்கரண்டி
மஞ்சள்த்தூள் – தேவைக்கேற்ப
மல்லித்தூள் – 2 தேக்கரண்டி
தக்காளி – 3
பச்சை மிளகாய் – 5
உப்பு – தேவையான அளவு
தண்ணீர் – 4 குவளை

எளிமையான மத்தி மீன் குழம்பு செய்முறை

முதலில் 1 குவளை நீரில் புளியை ஊறவைத்து கரைத்து எடுத்துக்கொள்ளவும். பின்னர் தேங்காய் துருவலுடன் சின்னசீரகம் மற்றும் சின்னவெங்காயம் சேர்த்து அம்மியில் அரைத்துக்கொள்ளவும்.

அரைத்து வைத்த தேங்காய் மசியலை மண் சட்டியில் போட்டு, மஞ்சள்த்தூள், மல்லித்தூள் மற்றும் மிளகாய்த்தூள் ஆகியவற்றுடன் சேர்த்து புளி கரைசலையும் ஊற்றி நன்றாக கலக்கவும். நன்றாக கரைத்த பின்பு வெட்டி வைத்துள்ள மத்தி மீன், தக்காளி, பச்சை மிளகாய் மற்றும் மூன்று குவளை தண்ணீரை ஊற்றி அடுப்பில் வைக்கவும்.

மிதமான வெப்பத்தில் குழம்பு நன்றாக கொதித்த பின்னர் அடுப்பை குறைத்து குழம்பை வற்ற விட வேண்டும். குழம்பு நன்றாக வற்றி குழம்பில் மீன் எண்ணெய் மிதக்க ஆரம்பித்ததும் தேவையான அளவு உப்பு சேர்த்து இறக்கினால் சுவையும் மணமுள்ள அருமையான மத்தி மீன் குழம்பு தயார்.

புளியில்லாத மீன் குழம்பிற்கு தேவையான பொருட்கள்

மத்தி மீன் (சாளை மீன்) – 1/2 கிலோ
சின்னவெங்காயம் – 15
தேங்காய் – 1/2 மூடி
சின்னசீரகம் – தேவைக்கேற்ப
மிளகாய்த் தூள் – 2 தேக்கரண்டி
மஞ்சள்த்தூள் – தேவைக்கேற்ப
மிளகு – 10
மல்லித்தூள் – 4 தேக்கரண்டி
தக்காளி – 4
பச்சைமிளகாய் – 5
உப்பு – தேவையான அளவு
தண்ணீர் – 4 குவளை

புளியில்லாத மீன் குழம்பு செய்முறை

முதலில் வடைசட்டியில் சிறிது கடலை எண்ணெய்யை ஊற்றி சின்னவெங்காயம், மிளகு, மிளகாய், தக்காளி மற்றும் சின்ன சீரகம் மூன்றையும் வதக்கி எடுத்து வைத்துக்கொள்ளவும். சூடு குறைத்த பின் தேங்காய் துருவலுடன் வதக்கி வைத்த சின்னசீரகம், மிளகு, மிளகாய், தக்காளி மற்றும் சின்னவெங்காயத்தை நன்றாக அரைத்துக்கொள்ளவும்.

அரைத்து வைத்த தேங்காய் மசியலை மண் சட்டியில் போட்டு, மஞ்சள்த்தூள், மல்லித்தூள் மற்றும் தேவையான அளவு மிளகாய்த்தூள் மற்றும் உப்பு சேர்த்து  நன்றாக கலக்கவும். அதனுடன் மூன்று குவளை தண்ணீரை ஊற்றி அடுப்பில் வைக்கவும்.

மிதமான வெப்பத்தில் குழம்பு நன்றாக கொதித்த பின்னர் அடுப்பை குறைத்து, வெட்டி வைத்துள்ள மத்தி மீனை குழம்பில் போட்டு அப்படியே வற்ற விட வேண்டும். மீனை குழம்பில் போட்ட பின்பு எக்காரணம் கொண்டும் கரண்டியை வைத்து குழம்பை கலக்கக்கூடாது. மீறி கலக்கினால் மீன்கள் உடைந்து குழம்பில் கரையத்தொடங்கிவிடும். குழம்பு நன்றாக வற்றி குழம்பில் மீன் எண்ணெய் மிதக்க ஆரம்பித்ததும் தேவைக்கு ஏற்ப உப்பு காரம் சேர்த்து இறக்கினால் சுவையும் மணமுள்ள அருமையான மத்தி மீன் குழம்பு தயார்.